Written by Mr. Gerry G. Gabiana
BUTUAN CITY, Okt. 27 (PIA) – Boluntarismo ang kinauyokan sa gipahigayon nga unang Caraga-wide Youth Leaders’ Orientation-Workshop niadtong Oktubre 21-22, 2011 sa Luciana Inn Convention Center, niining dakbayan sa Butuan, ubos sa temang: “Mobilizing Youth for Promotion and Advocacy on Newborn Screening.”
Gihatagan ug dakong bili ingon man usab ang importansiya sa boluntarismo ngadto sa tanang mitambong nga mga SK Leaders gikan sa nagkalain-laing lugar sa rehiyon sa Caraga, ingon nga nailhan na nga pinaagi sa mga kabatan-onan mahatagan ug igong solusyon ang nagatubo sa klasing kabataan nga may mga kakulangon sa pag-isip ug kadaghanan may gitawag nga birth defects.
Pinaagi sa Center for Health Development-Caraga napahigayon ang pagbansay arun ipakaylap sa tanang katawhan pinaagi sa boluntarismo sa kabatan-onan ang New Born Screening kon NBS.
Sa mensahe nga gipaabot ni Dr. Glyna B. Andoy-MPH, Regional NBS Medical Coordinator sa CHD-Caraga nga siya nagatoo nga ang boluntaryong pagpahimangno ug pagpakaylap alang niini nga pagbansay ang mga kabatan-onan lamang ang makabuhat, kung diin sila ang aktibong nga mopaabot ug kabag-ohan sa kumunidad nga ilang gipoy-an.
Sanglit pinaagi sa boluntarismo mapakaylap ug mapakusog ang Youth leader’s network for health ngadto sa mga kababayen-an kinsa bag-ong nanganak, nga mopatsek-up usab pinaagi sa Newborn Screening, folic acid supplementation, metabolic disorders, ug uban pang isyu may kalambigitan sa pagkab-ot sa maayong panglawas sa bag-ong gihimogso nga kabataan.
Pinaagi usab sa boluntarismo isip bag-ong stratehiya may katumanan ang pangandoy sa mga ginikanan nga mabatonan nila ang insakto nga pag-isip, maayong kondisyon sa panglawas og siguradong ehemplo ang mga bag-ong matawo nga kabataan sa kumunidad nga ilang gipoy-an ug gimat-an. (Butuan City PIO/PIA-Caraga)
